وادی بھر میں تقاریب،لیفٹیننٹ گورنرکی ایک گھنٹہ کے پروگرام میں شرکت
سرینگر// لیفٹیننٹ گورنر منوج سنہا نے اتوار کو شہریوں کی قیادت میں سوچھتا مہم کے لیے ایک گھنٹے کے شرمدان میں حصہ لیا اور ڈل جھیل میں صفائی اور گھاس پھوس ختم کرنے کی مہم کی قیادت کی۔وہ زندگی کے تمام شعبوں سے تعلق رکھنے والے شہریوں میں شامل ہوئے جو مہاتما گاندھی کو خراج عقیدتپیش کرنے کے لیے بڑی تعداد میں جمع تھے۔لیفٹیننٹ گورنر نے اس موقعہ پر کہا”جس طرح سے ہم ارد گرد دیکھتے ہیں وہ ہماری زندگی کا تجربہ بن جاتا ہے،صفائی خوشی، مسرت اور خوشحالی لاتی ہے،یہ خدا کے قریب پہنچنے کا دروازہ ہے، مجھے یہ دیکھ کر خوشی ہو رہی ہے کہ صفائی کو معاشرے کی آرزو میں تبدیل کر دیا گیا ہے اور کچرے سے پاک شہر اور دیہات اب کوئی تصور نہیں بلکہ حقیقت بن گئے ہیں‘‘۔
لیفٹیننٹ گورنر نے عوام سے متحد کوششیں کرنے اور کچرے سے پاک ہندوستان کے وژن کو عملی جامہ پہنانے کے لیے تعاون کرنے کی اپیل کی۔انہوں نے کہا کہ سوچھتا ہی سیوا مہم، وزیر اعظم نریندر مودی جی کی رہنمائی میں جموں و کشمیر میں ایک عوامی تحریک بن گئی ہے۔ لیفٹیننٹ گورنر نے کہا کہ یہ ہماری اجتماعی ذمہ داری ہے کہ ہم اپنے گردونواح، اپنی جھیلوں اور دریاں کی حفاظت کریں اور صفائی کے بارے میں بیداری پھیلائیں۔انہوں نے کہا کہ پورے جموں و کشمیر میں سوچھ انقلاب روزی روٹی کے نئے مواقع بھی پیدا کر رہا ہے، زیادہ آمدنی پیدا کر رہا ہے اور معیار زندگی کو بہتر بنا رہا ہے، اور یوٹی میں سوچھتا تحریک کو مضبوط کرنے کے لیے انتظامیہ کے عزم کا اعادہ کیا۔یوٹی سطح کی تقریب میں، لیفٹیننٹ گورنر نے ‘ماڈل’ زمرے کے تحت جموں و کشمیر کے 100% دیہاتوں کو او ڈی ایف پلس کا درجہ حاصل کرنے پر شہریوں اور انتظامیہ کو مبارکباد دی۔انہوں نے کہا کہ یہ تاریخی سنگ میل نئی صلاحیتوں، امکانات اور خود اعتمادی سے بھرے خوابوں کے گائوں کی تعمیر کے ہمارے متحد عزم کی نشاندہی کرتا ہے۔لیفٹیننٹ گورنر نے عہدیداروں اور شہریوں کو سوچھتا کا عہد کروایا۔ انہوں نے شکاریوں کے بیڑے کو بھی جھنڈی دکھا کر چار چناری میں صفائی مہم میں حصہ لیا۔ڈل جھیل کے گولڈن آئی لینڈ میں، لیفٹیننٹ گورنر نے اسکول کے طلبا سے بات چیت کی اور انہیں سوچھاگڑھی بننے کی ترغیب دی۔
