سرینگر طیران گاہ سے کارگو پروازیں | کسٹم حکام کی نو ٹیفکیشن جاری

سرینگر //سرینگر بین الاقوامی ہوائی اڈے سے اب براہ راست بیرون ممالک سامان روانہ کیا جا سکتا ہے ۔کسٹم حکام نے اس سلسلے میں ایک نوٹیفکیشن جاری کی ہے۔مرکزی حکومت کی طرف سے جاری نوٹیفکیشن کے مطابق سرینگر طیرا ن گاہ کے کارگو ٹرمینل کو بیرون ملک سامان در آمد و بر آمد کرنے کیلئے استعمال کیا جائیگا۔اس اقدام سے کشمیر کی باغبانی کی پیداوار، دستکاری و دیگر اشیاء کی در آمدات کو کافی فروغ ملنے کا امکان ہے۔ڈائریکٹر سرینگر ائیر پورٹ کلدیپ سنگھ نے کشمیر عظمیٰ کو بتایا کہ مرکزی حکومت کی طرف سے جاری نوٹیفکیشن اور اجازت سے اب کارو بار و تجارت سے وابستہ افرادسرینگر سے براہ راست سامان کی در آمد و بر آمد کے لئے اپنی خدمات پیش کر سکتے ہیں۔انہوں نے کہا کہ یہ نوٹیفکیشن10مارچ کو جاری کی گئی،جو سرینگر ایئر پورٹ کی تاریخ میں سنہرے حروف سے لکھی جائے گی۔ان کا کہنا تھا کہ اب ائیر لائنز خصوصی کارگو پروازیں چلا سکتی ہیں ۔موصوف ڈائریکٹر نے تمام ائیر لائنز سے اس سہولیات سے بھر پور فائدہ اٹھانے کی اپیل کی ہے۔ انہوں نے سرینگر اور گرد و پیش کی تاجر برادری کو بھی اپنے تجارت کو دوام بخشنے اور اپنے خوابوں کو شر مندہ تعبیر کرنے کے لئے اس سہولیت اور موقعے سے بہرہ مند ہونے کی دعوت دی۔سنگھ نے امید ظاہر کی کہ یہ سہولیت نہ صرف اقتصادی ترقی میں ایک بڑا اقدام ثابت ہوگی بلکہ اس سے ائیر پورٹ کے متصل علاقوں میں روزگار کے مزید موقع بھی پیدا ہوں گے۔