حکومت کی ساکھ ہم پر منحصر ہے،منصوبوں کا مثبت نفاذ سب سے اہم : وزیر اعلیٰ
سرینگر// وزیر اعلی عمر عبداللہ نے ہفتے کے روز عہدیداروں کو ہدایت دی کہ وہ سردیوں میں لوگوں کو پریشانی کا شکار نہ ہونے دیں کیونکہ خشک موسم نے چیلنجوں میں اضافہ کر دیا ہے۔ انہوں نے افسران سے کہا کہ وہ مناسب بجلی کی فراہمی کو یقینی بنائیں اور کسی بھی صورتحال سے نمٹنے کے لیے جوانوں اور مشینری کو تیار رکھیں۔ عمر عبداللہ نے سول سیکرٹریٹ میں اعلی سطحی میٹنگ کی صدارت کرتے ہوئے وادی کشمیر اور جموں ڈویژن کے سرمائی علاقوں میں 2024-25 کے موسم سرما کی تیاریوں کا جائزہ لیتے ہوئے مثبت عملدرآمد کی اہم اہمیت پر زور دیا۔ انہوں نے کہا “منصوبوں کا اعلان کیا گیا ہے، لیکن عملدرآمد اب اہم ہے، ہماری تیاریوں کا صحیح معنوں میں پہلی برف باری کے ساتھ امتحان لیا جائے گا‘‘۔ وزیر اعلی نے کہا کہ طویل خشک موسم پہلے ہی پانی کی سطح میں کمی اور پانی کے بہائو میں کمی کی وجہ سے بجلی کی پیداوار میں کمی کے چیلنجز پیدا کر رہا ہے۔انہوں نے کہا “حکومت کی ساکھ ہم پر منحصر ہے؛ ایک بار جب منصوبوں کا اعلان کیا جاتا ہے، مثبت نفاذ سب سے اہم ہو جاتا ہے، “۔جموں اور دیگر ضلعی ہیڈکوارٹرز کے افسران نے ویڈیو کانفرنسنگ کے ذریعے شرکت کی۔میٹنگ کے دوران ڈویژنل کمشنر کشمیر نے کشمیر ڈویژن میں پہلے سے موجود موسم سرما کی تیاریوں کے بارے میں ایک جامع بریفنگ پیش کی۔موسم سرما کے ایکشن پلان کے اہم اجزا کی تفصیلات بتاتے ہوئے، اجلاس کو بتایا گیا کہ بین الاضلاعی شاہراہوں، ضلعی سڑکوں، روڈز کی برف صاف کرنے اور ان کی دیکھ بھال کو ترجیح دی گئی ہے اور ہسپتالوں، پی ایچ ای کی فراہمی، گرڈ اسٹیشن، اور فائر اینڈ ایمرجنسی سروسز،ضروری خدمات اور کام کو یقینی بنانے پر توجہ دی جائے گی۔وزیر اعلی کو بتایا گیا کہ تمام ضروری مشینری ان کو موثر طریقے سے چلانے کے لیے تیار ہے۔انکو بتایا گیا کہ بانڈی پورہ کے گریز اور کپواڑہ کے کچھ حصوں میں، جہاں موسم سرما کی رسائی محدود ہے، ایندھن کی کافی فراہمی پہلے سے ذخیرہ کر دی گئی ہے۔ سرینگر میونسپل کارپوریشن اور دیگر اربن لوکل باڈیز نے پانی نکالنے کی سرگرمیوں کے لیے کمر کس لی ہے، پمپ سیٹ اور تیار ہیں۔ سردیوں کے ضروری ذخیرے، بشمول غذائی اجناس، ایندھن، جنریٹرز کے لیے HSD، اور مرمت شدہ ڈسٹری بیوشن ٹرانسفارمرز، پوزیشن میں ہیں۔ مزید برآں، ہنگامی اور طبی ضروریات کو پورا کرنے کے لیے جموں و کشمیر کے برفباری والے علاقوں کے لیے سبسڈی والی ہیلی کاپٹر خدمات دستیاب ہیں۔انہیں بتایا گیا ہے کہ طبی سہولیات مناسب ادویات، آکسیجن سلنڈر اور لکڑی سے لیس ہیں، مارچ 2025 تک ہسپتالوں کے لیے ڈیوٹی روسٹر جاری کیے گئے ہیں۔ڈویژنل، ضلعی اور محکمانہ سطح پر کنٹرول روم قائم کیے گئے ہیں تاکہ موسم سرما کے دوران کوآرڈینیشن اور فوری ردعمل کو یقینی بنایا جا سکے۔وزیر اعلی نے کٹ آف علاقوں میں یقینی ہیلی کاپٹر سروس اور آپریٹرز کے لیے ہیلی کاپٹر خدمات کو مالی طور پر قابل عمل بنانے کی ہدایات دیں۔سردیوں کے چیلنجوں سے موثر انداز میں نمٹنے کے لیے وزیراعلیٰ نے ہسپتالوں کو لیس کرنے، بجلی کی فراہمی کے نظام الاوقات پر عمل کرنے، دور دراز علاقوں میں خالی آسامیوں کو پر کرنے اور آنے والے سخت سردیوں کے مہینوں میں صحت عامہ اور حفاظت کے لیے بروقت اقدامات کرنے کی ہدایت کی۔
