نواز رونیال
رام بن // ضلع ترقیاتی کمشنر رام بن مسرت الاسلام نے ضلع رام بن کے عازمین کے پہلے قافلے کو جدید جامع مسجد کیفٹیریا رام بن میں منعقد دعائیہ مجلس کے بعد ہری جھنڈی دکھا کر حج ہاؤس سرینگر کیلئے روانہ کیا۔ضلع رام بن کے رواں سال کے کل 115 عازمین حج میں سے آٹھ افراد پر مشتمل پہلا قافلہ کل سرینگر ائیرپورٹ سے جدہ کیلئے سفر محمود کیلئے روانہ ہوگا۔
ضلع رام بن کے باقی 97 عازمین پندرہ جون کو سرینگر ائیرپورٹ کیلئے روانہ ہونگے۔جدید جامع مسجد رام بن میں یہ دعائیہ مجلس کا اہتمام کیا گیا جہاں ضلع رام بن کے معزز شہریوں ،ضلع انتظامیہ سربراہ مسرت الاسلام کے ہمراہ اے سی آر رام بن غیاث الحق بھی موجودتھے۔ اس موقع پر امام جامع مسجد مفتی نظیر احمد نے تمام عازمین کا استقبال کیا۔ ضلع ترقیاتی کمشنر رام بن مسرت الاسلام نے عازمین سے بات کرتے ہوئے اس بات کا اعادہ کیا کہ تمام عازمین کے سفر کے دروان کی رہبری کیلئے ضلع انتظامیہ اپنے افسران کے ہمراہ حج کمیٹی جموں و کشمیر کے ساتھ رابطے میں ہے تاکہ عازمین کو دوران سفر کسی بھی مشکلات کا سامنا نہ ہو۔ انہوں نے س موقع پر عازمین سے ضلع رام بن کی ترقی و خوشحالی کی دعاؤں کی درخواست کی اور انہیں مبارکباد پیش کی۔
