محمد تسکین
بانہال// منگل کی شام ضلع رام بن میں تحصیل اْکڑال پوگل پرستان کے چیولی گجرارہ میں ساتویں جماعت کا ایک طالب علم پیر پھسل کر نالہ میں ڈوب جانے سے لقمہ اجل ہو گیا ہے۔ تیراں سالہ بشارت احمد بٹ ولد محمد شریف بٹ ساکنہ چیولی گجرارہ مڈل سکول گجرارہ میں ساتویں جماعت کا طالب علم تھا اور اس کی موت پر پوار علاقہ اور سکول کے بچے اور عملہ سکتے میں ہے اور پورے علاقے میں صف ماتم بچھی ہوئی ہے۔ مڈل سکول گجرارہ کے ہیڈماسٹر فاروق احمد لون نے کشمیر عظمی کو بتایا کہ ہمارے سکول کا فرمانبردار اور پیارا بچہ بشارت احمد بٹ پیر کے روز سالانہ امتحان میں بیٹھا ہوا تھا اور منگل کی شام پانچ بجے کے قریب وہ پھسل کر سینابتی نالہ میں گر گیا۔ عینی شاہدین نے بتایا کہ وہاں نالے کے پاس کئی بچے کھیل رہے تھے اور اس دوران بشارت احمد کا جوتا پانی میں چلا گیا اور اسے نکالنے کی کوشش میں وہ بھی نالہ سینابتی میں بہہ گیا۔ انہوں نے کہا کہ مقامی لوگوں کیطرف سے بچاو کاروائیوں کا آغاز کیا گیا لیکن یہ معصوم تب تک نالہ کے پانی میں ڈوب کر لقمہ اجل بن چکا تھا اور قریب آدھے گھنٹے کی تلاش کے بعد بشارت احمد کی لاش نالہ سینابتی سے برآمد کی گئی۔انہوں نے کہا کہ پورا علاقہ اور مڈل سکول گجرارہ کا سٹاف بشارت احمد کی المناک موت پر غم زدہ اور رنجیدہ ہے اور ان کے اہلخانہ کے ساتھ دکھ کی اس گھڑی میں سکول انتظامیہ غمزدہ خاندان کے ساتھ کھڑی ہے۔
