عظمیٰ نیوز ڈیسک
پونے// وزیر اعظم نریندر مودی نے منگل کو کہا کہ کانگریس کشمیر میں دفعہ 370 کی بحالی کا مطالبہ کرکے’پاکستان کی زبان‘ بول رہی ہے۔پونے میں ایک ریلی سے خطاب کرتے ہوئے مودی نے کہا’’دفعہ 370 کو ہم نے زمین میں دفن کر دیا ہے اور کوئی اسے واپس نہیں لا سکتا‘‘۔انہوں نے کہا کہ ملک دفعہ 370 کی بحالی کے مطالبے کو کبھی قبول نہیں کرے گا۔وزیراعظم نے کہا’’کانگریس نے جموں و کشمیر اسمبلی میں دفعہ 370 کو دوبارہ نافذ کرنے کی قرارداد منظور کی ہے۔ جو لوگ آئین کی کتابیں دکھا رہے ہیں اور مہاراشٹر میں خالی کتابیں بانٹ رہے ہیں، میں ان سے پوچھنا چاہتا ہوں کہ 6 سے 7 دہائیوں تک حکمرانی کرنے کے باوجود انہوں نے آئین کو پورے بھارت میں کیوں نہیں نافذ کیا؟‘‘۔انہوں نے کہا’’عوام کی دعاؤں سے آپ کے خدمتگار مودی نے دفعہ 370 کو زمین میں دفن کر دیا ہے۔ دفعہ 370 نے کشمیر کو بھارت سے الگ رکھا اور کشمیر میں دہشت گردی اور علاحدگی پسندی کو فروغ دیا‘‘۔انہوں نے مزید کہا’’دفعہ 370 کی منسوخی کے بعد ہم نے کشمیر میں ترنگا لہرایا، امن قائم کیا اور علیحدگی پسندوں کے منصوبے ناکام بنائے‘‘۔مودی نے کہا’’کرناٹک میں کانگریس نے جھوٹ بولا اور لوگوں سے ووٹ مانگے۔ انہوں نے حکومت بنائی مگر اپنے وعدے پورے نہیں کیے۔ اس کے بجائے وہ کرناٹک میں بھتہ مہم چلا رہے ہیں‘‘۔انہوں نے کہا’’کرناٹک میں آئے دن گھوٹالے سامنے آ رہے ہیں۔ کانگریس دن دہاڑے لوگوں کو لوٹ رہی ہے اور الزام ہے کہ وہ اسی پیسے کو مہاراشٹر کے انتخابات میں خرچ کر رہے ہیں‘‘۔مودی نے زور دیتے ہوئے کہا’’اگر ہمیں مہاراشٹر کو بچانا ہے تو ہمیں کانگریس سے دور رہنا ہوگا‘‘۔مودی نے مزید کہا کہ انہوں نے مہاراشٹر کے مختلف علاقوں کا دورہ کیا ہے اور اعتماد کے ساتھ کہہ سکتے ہیں کہ بی جے پی کی قیادت میں مہایوتی اتحاد ریاستی اسمبلی انتخابات میں کامیابی حاصل کرے گا اور ریاست کی تیز ترقی کے لیے کام کرے گا۔انہوں نے کہا’’مہاراشٹر جانتا ہے کہ ترقی صرف مہایوتی اتحاد کی قیادت میں ممکن ہے‘‘۔مودی کے مطابق مہایوتی حکومت کے تحت مہاراشٹر میں ترقیاتی کام کی رفتار بے مثال رہی ہے۔ انہوں نے کہا’’مہا وکاس اگھاڑی حکومت کے دو سالوں کا زیادہ تر حصہ ہمارے منصوبوں کو روکنے میں گزارا گیا۔ یہ کانگریس اور اس کے اتحادیوں کی سیاست کا طریقہ ہے‘‘۔
