نئی دہلی// نیشنل کانفرنس کے رکن پارلیمنٹ فاروق عبداللہ نے کہا ہے کہ اگر اپوزیشن مطالبہ کرتی ہے تو پارلیمنٹ میں کوئی بھی بل لانے سے پہلے حکومت کو اسے سلیکٹ کمیٹی کے پاس بھیجنا چاہئے ورنہ یہ زرعی قانون کی طرح بعد میں تنازع پیداہوسکتا ہے ۔سال 2022-23 کے مرکزی بجٹ پر عام بحث کے تیسرے دن ڈاکٹر فاروق عبداللہ نے کہا کہ ملک غریب سے غریب تر ہوتا جارہا ہے اور امیروں کی دولت میں اضافہ ہوتا جارہا ہے ۔ منریگا کے بجٹ میں کٹوتی کرنا ناانصافی ہے ۔ انہوں نے کہا کہ سیاحت جموں و کشمیر کی معیشت میں ریڑھ کی ہڈی کی حیثیت رکھتی ہے ۔ اس سے لاکھوں لوگوں کی روزی روٹی سے جڑی ہے ۔ حکومت سیاحت کو انڈسٹری کا درجہ دے ۔ بھارتیہ جنتا پارٹی کے دلیپ گھوش نے بتایا کہ یہ بجٹ کورونا وبا میں ہونے والے نقصان سے نکلنے اور معیشت کو پٹری پر واپس لانے کے مقاصد کو مدنظر رکھتے ہوئے لایا گیا ہے ۔ انہوں نے کہا کہ یہ بجٹ اوپر سے معمولی دکھائی دے سکتا ہے لیکن جامع ہے اور اگلے 25 برسوںکے ترقیاتی اہداف کے حصول کا نقش راہ ہے ۔
حکومت کسی بھی بل کو پارلیمنٹ میں لانے سے پہلے سلیکٹ کمیٹی کو بھیجے :ڈاکٹرفاروق
