حد متارکہ پر دھماکے کے بعد فوج الرٹ

راجوری //مینڈھر کے کرشنا گھاٹی سیکٹر میں حد متارکہ پر دھماکہ ہونے کے بعد فوج کو الرٹ پر رکھاگیاہے ۔یہ دھماکہ پیر کی صبح ہوا جس کے بعد جنگجوئوں کے ایک گروپ کی طرف سے دراندازی کرنے کا خدشہ ظاہر کیاگیا۔ذرائع نے بتایاکہ پیر کی علی الصبح 5بجے زیرو لائن پر چور نالہ کے نزدیک ایک دھماکے کی آواز آئی ۔ذرائع نے بتایاکہ یہ دھماکہ بارودی سرنگ کاہوسکتاہے جو کسی کا پائوں پڑ جانے سے ہواہوگا۔ذرائع نے بتایاکہ اس بات کا شبہ ہے کہ جنگجوئوں کے ایک گروپ نے دراندازی کی کوشش کی تاہم ان میں سے ایک کا پائوں جب بارودی سرنگ پر پڑاتواس کے نتیجہ میں دھماکہ ہوا۔ ذرائع کاکہناہے کہ خراب موسم اور دھند کی وجہ سے دھماکہ کی جگہ صاف دکھائی نہیں دے رہی اور ایسے حالات میں نہ ہی فوج کیلئے یہ ممکن ہے کہ وہ اس جگہ پہنچ کر معائنہ کرے ۔جموں میں مقیم فوج کے ترجمان لفٹنٹ کرنل دیوندر انند نے کشمیرعظمیٰ کو بتایاکہ دھماکہ ہواہے لیکن اس سے زیادہ کچھ واضح نہیں ہوپایا۔انہوں نے بتایاکہ مزید پیشرفت ہونے پر اطلاع شیئر کی جائے گی ۔دریں اثناء ذرائع نے بتایاکہ حد متارکہ کے پر تلاشی کارروائی کی جارہی ہے اور فوج کی طرف سے الرٹ جاری کیاگیاہے ۔