جموں و کشمیر پولیس ’’غیر سیاسی‘‘ فورس خالصتاً غیر جانبداری سے کام کرتی ہے:وجے کمار

 عظمیٰ نیوز سروس

جموں// ایڈیشنل ڈائریکٹر جنرل آف پولیس(اے ڈی جی پی) وجے کمار نے بدھ کو کہا کہ جموں و کشمیر پولیس ایک “غیر سیاسی” فورس ہے اور غیر جانبدارانہ بنیادوں پر کام کرتی ہے۔یوم عاشورہ کے موقع پر جڈی بل سرینگر کے دورے کے دوران صحافیوں سے بات کرتے ہوئے وجے کمار نے کہا کہ ہر سال کی طرح جموں و کشمیر پولیس نے 10 محرم کو سوگواروں کی سہولت کے لیے ہر جگہ اسٹال لگائے ہیں۔ اے ڈی جی پی نے کہا”یہ ایک اچھی بات ہے اور پولیس کا معاشرے میں بہت بڑا کردار ہے۔ ہم نے جموں و کشمیر میں 10ویں محرم کے جلوسوں کے ہموار انعقاد کے لیے سیکورٹی فراہم کی ہے‘‘۔جب ڈی جی پی آر آر سوین کے اس بیان کے بارے میں پوچھا گیا کہ کشمیر میں مقیم سیاسی جماعتیں “انتخابی فائدے کے لیے ملی ٹینٹ ،نیٹ ورک کے لیڈروں کو تیار کر رہی ہیں”، تو اے ڈی جی پی نے جواب دیا کہ “جے اینڈ کے پولیس غیر سیاسی اور غیر جانبدار فورس ہے”۔اے ڈی جی پی نے مزید کہا، “ڈی جی پی کے بیان میں ان کی ذاتی رائے ہو سکتی ہے، ورنہ جے اینڈ کے پولیس خالصتاً غیر سیاسی ہے اور غیر جانبداری سے کام کرتی ہے۔”اس موقع پر انہوں نے شہدائے کربلا کو خراج عقیدت پیش کیا اور لوگوں سے امن، ہم آہنگی اور امن و امان برقرار رکھنے کی اپیل کی۔