سید اعجاز
ترال//ترال کی گوجر بستی برن پتھری ناگہ بل کی قدرتی خوبصورتی لا مثال ہونے کے باجود ارباب اقتدار نے نظر انداز کیا ہے۔مقامی لوگوں کا کہنا ہے کہ چند سال پہلے اس بستی تک پردھان منتری گرام یوجنا کے تحت ناگہ نامی گائوں سے ایک بہترین سڑک کو تعمیر کیا گیا جس کے ساتھ ہی برن پتھری کی اس قدرتی خوبصورتی کا نظارہ کرنے کیلئے لوگوں کی بڑی تعداد نے آنا شروع کیا ۔علاقے سے تعلق رکھنے والے لوگوں نے بتایا کہ یہاں آنے والے لوگوں کا ماننا ہے کہ بنیادی ڈھانچہ کی ترقی سے یہ جگہ سیر کیلئے اہم مقام کے طور پر ابھرسکتا ہے۔برن پتھری سے اکثر لوگ بانل مرگ ،وٹ وگن،منڈون،پن ژال،منور سر،وغیرہ سمیت درجنوں مقامات تک جاتے ہیں جہاں اب یہ پیدل سفر برن پتھری تک سڑک کی تعمیر سے آسان بن گیا ہے ۔لوگوں کا کہنا ہے کہ جب سڑک تعمیر ہوئی تو ایک امید کی کرن نظر آئی لیکن سیاحت کے اعتبار سے کوئی قدم نہیں اٹھایا گیا ۔ علاقے کے نوجوانوںکا کہنا ہے کہ برن پتھری واحد بستی ہے جہاں کوئی بھی موبائل ٹاور نصب نہیں کیا گیاہے ۔انہوں نے بتایا کہ آج کے اس سائنسی دور میں بھی وہ شام ہوتے ہی دنیا سے کٹ کر رہ جاتے ہیں۔ انہوں نے سرکار سے اس بارے میں مداخلت کی اپیل کی ۔
