راجا ارشاد احمد
بابا نگری کنگن//وزیر برائے خوراک، شہری رسدات و امور صارفین، ٹرانسپورٹ، اِنفارمیشن ٹیکنالوجی، اَمورِ نوجوان و کھیل کود ستیش شرما نے میاں نظام الدین کیانی ؒ کے 129 ویں سالانہ عرس کے موقعہ پر ضلع گاندربل میں بابا نگری زیارت گاہ کنگن کا دورہ کیا۔ اُنہوں نے وہاں حاضری دی اور عقیدت مندوں اور مقامی اِنتظامیہ سے بات چیت کی۔ دورے کے دوران اُنہوں نے عقیدت مندوںکے لئے دستیاب سہولیات کا جائزہ لیا اور علاقے میں بابا نگری کی روحانی و ثقافتی اہمیت کو اُجاگر کیا۔وزیر ستیش شرما نے بابا نگری کنگن سے راجوری کو ٹی آر سی سرینگر کے راستے سے جوڑنے والی جے کے آر ٹی سی خصوصی بس سروس کا اِفتتاح کیااور روانگی کے لئے ہری جھنڈی دِکھائی۔ اِس موقعہ پر رُکن پارلیمان میاں الطاف، ممبر قانون ساز اسمبلی میاں مہر علی اور جے کے آر ٹی سی کے اَفسران و عملہ بھی موجود تھے۔ اُنہوںنے اِجتماع سے خطاب کرتے ہوئے کہا،’’بابا نگری پورے جموں و کشمیر کے ہزاروں لوگوں کے دلوں میں ایک خاص مقام رکھتی ہے۔ اِس بس سروس کے آغاز کا مقصد بین الاضلاع رابطے کو فروغ دینا، مذہبی سیاحت کو ترقی دینا اور عقید ت مندوں کے سفر کو آسان بنانا ہے۔‘‘
