ارشاد احمد
سرینگر// میونسپل کارپوریشن نے بدھ کو ایک ٹپر ڈرائیور پر ایک لاکھ روپے کا جرمانہ عائد کیا۔مذکورہ ٹپر ڈرائیور دودھ گنگا فلڈ چینل اور پانتھہ چوک بٹہ مالو بائی پاس روڈ کے کنارے کچرے کے ڈھیروں کو غیر قانونی طور پر اتارنے اور پھینکنے میں ملوث تھا۔ حکام کے مطابق پچھلے کچھ مہینوں سے یہ دیکھا گیا کہ دودھ گنگا فلڈ چینل کے کنارے، پانتہ چھوک بٹہ مالو بائی پاس روڈ، بالخصوص نوگام سے، اندرونی شہر جیسے صنعت نگر، برزلہ پل، مہجور نگر، ٹینگہ پورہ، راول پورہ میں کچھ بے ضمیر عناصر کی طرف سے بھاری بھرکم کچرا غیر قانونی طور پر اتار کر پھینکا جاتا ہے۔ کمشنر اطہر امیر خان نے کہا کہ بھاری کچرے کے اس غیر قانونی ڈمپنگ نے شہر کا ماحول بری طرح خراب کر دیا ۔انہوں نے کہا کہ کارپوریشن باریک بینی سے نظر رکھے ہوئے ہے اور ایسے شرپسندوں کو پکڑنے کے لیے کام کر رہی ہے جو ماحول کو نقصان پہنچاتے ہیں اور شہر کو انتہائی خطرناک حالات کی طرف دھکیلتے ہیں۔انہوں نے کہا کہ یکم جنوری کو رات تقریباً 10.42 بجے ایک کارروائی میں ٹپر نمبر/3649 JK02AC کو گورنمنٹ سکول کے قریب راولپورہ میں کچرے سے بھرے ٹپر کو اتارتے ہوئے رنگے ہاتھوں پکڑا گیا۔ تاہم ٹپر ڈرائیور پرویز احمد گنا ئی ولد علی محمد گنائی ساکن بونیار بارہمولہ نامعلوم افراد کی مدد سے فرار ہونے میں کامیاب ہوگیا۔کارپوریشن نے ایک اور اطلاع پر کارروائی کرتے ہوئے،18مارچ کو رات تقریباً 11 بجے ایک بار پھر ٹپر کو پل کے قریب برزلہ میں کچرا اتارتے ہوئے پکڑا ۔کارپوریشن نے ٹپر کو ضبط کرکے اپنی تحویل میں لے لیا۔پتہ چلا کہ ٹپر میسرز بوہرو ٹریڈنگ کارپوریشن کے ساتھ کام کر رہا تھا، جو کہ اسٹیشن ہیڈکوارٹر، اولڈ ایئر فیلڈ، رنگریٹ کے سروس کنٹریکٹ کے تحت ہے اور اسٹیشن ہیڈکوارٹر سے جمع ہونے والے فضلے کو کارپوریشن کے علاقائی دائرہ اختیار میں ماحولیاتی قوانین اور قواعد کی ڈھٹائی سے خلاف ورزی کرتے ہوئے پھینکا جا رہا ہے۔8مارچ2022 راجہ مظفر بھٹ بمقابلہ یونین آف انڈیا اور دیگر، معزز نیشنل گرین ٹربیونل کے حکم کے ذریعے، UT حکام کو آلودگی پھیلانے والوں پر اخراجات عائد کرنے کا اختیار دیا گیا ہے۔جبکہ میونسپل کارپوریشن ایکٹ، 2000 کے تحت کچرے کی غیر قانونی ڈمپنگ بھی ایک سنگین جرم ہے۔ غیر قانونی کاموں کے لیے مزکورہ ٹپر ڈرائیور /مالک پر 1.00 لاکھ جرمانہ عائد کیا گیا ہے جو 10 دنوں کی مدت کے اندر میونسپل کارپوریشن سرینگر میں جمع کرائے جائیں گے۔
