ہندوستانی کھلاڑیوں سے امتیازی سلوک پر اعتراض
یو این آئی
نئی دہلی// ہندوستان نے چین کے ذریعہ اس کے کچھ کھلاڑیوں کو 19ویں ایشیائی کھیلوں میں داخلہ دینے سے محروم کئے جانے پر جمعہ کے روز سخت اعتراض ظاہر کیا اور کھیل و نوجوانوں کے امور کے مرکزی وزیر انوراگ ٹھاکر کا دورہ چین منسوخ کر دیا گیا ہے۔وزارت خارجہ کے سرکاری ترجمان ارندم باگچی نے جمعہ کو یہاں کچھ ہندوستانی کھلاڑیوں کو 19ویں ایشیائی کھیلوں میں داخلے سے محروم کئے جانے پر میڈیا کے سوالات کے جواب میں کہا کہ حکومت ہند کو معلوم ہوا ہے کہ چینی حکام نے نشانہ بناتے ہوئے اورپہلے سے طے شدہ طریقے سے اروناچل پردیش کے کچھ ہندوستانی کھلاڑیوں کو چین کے شہر ہانگژو میں منعقد ہونے والے 19ویں ایشین گیمز میں منظوری دینے اور داخلے سے محروم کرکے ان کے ساتھ امتیازی سلوک کیاہے۔
باگچی نے کہا’’ہمارے دیرینہ اور متعلقہ صورتحال کے مطابق، ہندوستان سختی سے ہندوستانی شہریوں کے ساتھ ان کی رہائش کی جگہ اور نسل کی بنیاد پر امتیازی سلوک کو مسترد کرتا ہے۔ اروناچل پردیش ہندوستان کا اٹوٹ اور لازمی حصہ ہے اور رہے گا‘‘۔انہوں نے کہا’’حکومت ہند نے چین کے ذریعہ ہمارے کچھ کھلاڑیوں کو جان بوجھ کر نشانہ بنانے پر چین سے سخت احتجاج درج کرایا ہے‘‘۔چین کا یہ اقدام ایشین گیمز کی روح اور ان کے طرز عمل کو کنٹرول کرنے والے قوانین دونوں کی خلاف ورزی ہے اور واضح طور پر رکن ممالک کے حریفوں کے تئیں امتیازی سلوک کو ظاہر کرتا ہے‘‘۔ترجمان نے کہا کہ چین کے اس اقدام کے خلاف احتجاج کرتے ہوئے وزیر کھیل نے اپنا چین کا طے شدہ دورہ منسوخ کر دیا ہے۔ انہوں نے کہا کہ حکومت ہند کو اپنے مفادات کے تحفظ کے لیے مناسب اقدامات کرنے کا حق ہے۔قابل ذکر ہے کہ چین نے ہندوستان کے اروناچل پردیش کی رہنے والی تین اہم خواتین ووشو کھلاڑیوں نیمان وانگسو، اونیل تیگا اور میپنگ لامگو کوہانگژو میں منعقد ہونے والے ایشین گیمز میں اپنے یہاں آنے کی اجازت نہیں دی۔اس سے پہلے بھی 26 جولائی کو چین نے ان تینوں کھلاڑیوں کو ورلڈ یونیورسٹی گیمز کے لیے اسٹیپل ویزے جاری کیے تھے۔
