امشی پورہ شوپیان میں خونریز معرکہ آرائی| شہری اور 2ملی ٹینٹ جاں بحق

شوپیان //امشی پورہ شوپیان میں سیکورٹی فورسز کیساتھ ایک خونریز معرکہ آرائی میں 2مقامی ملی ٹینٹ اور ایک شہری جاں بحق ہوئے۔پولیس نے دعویٰ کیا ہے کہ شہری کراس فائرنگ میں مارا گیا ۔ مہلوک ملی ٹینٹوں میں ایک صرف 2 روز قبل گھر سے لاپتہ ہوا تھا۔ضلع میں دن بھر موبائل انٹر نیٹ سروس معطل کی گئی۔

پولیس نے بتایا کہ انہیں امشی پورہ گائوں میں 2ملی ٹینٹوں کی موجودگی کی اطلاع ملی جس کے بعد برف سے ڈھکے امشی پورہ کی بستی کا محاصرہ کیا گیا۔پولیس کا کہنا ہے کہ44آر آر، 14بٹالین سی آر پی ایف اور پولیس کے سپیشل آپریشن گروپ کی جانب سے دوران شب 3بجے شدید سردی کے باوجود برف سے ڈھکے گائوں کی ناکہ بندی کی گئی۔انہوں نے کہا کہ بستی کی تلاشیاں لی گئیں لیکن ملی ٹینٹوں کی موجودگی بستی سے الگ تھلگ چار پانچ مکانوں میں پائی گئی جس کے بعد ان مکانوں کا بھی محاصرہ کیا گیا۔پولیس نے مزید بتایا کہ دو مقامی ملی ٹینٹوں کے بارے میں مصدقہ اطلاع ملنے کے بعد انکے والدین اور قریبی رشتہ داروں کو بلایا گیا لیکن ملی ٹینٹوں نے سرنڈر نہیں کیا بلکہ جب تلاشی  قریب 11بجے کارروائی شروع کی گئی تو انہوں نے مکان سے باہر آکر اندھا دھند فائرنگ کی، جس کے نتیجے میں 50 سالہ شہری شکیل احمد خان ولد عبدالرحیم خان شدید زخمی ہوا۔ زخمی شہری کو طبی امداد دینے  کے دوران وہ زخموں کی تاب نہ لاتے ہوئے دم توڑ گیا۔تاہم مقامی لوگوں کا کہنا ہے کہ شکیل احمد مالک مکان تھا جس کے مکان میں ممکنہ طور پر ملی ٹینٹوں نے پناہ لی تھی، لیکن مذکورہ مکان میں کوئی جھڑپ نہیں ہوئی۔مقامی لوگوں کا مزید کہنا ہے کہ مہلوک دو ملی ٹینٹوں میں ایک محض 2روز قبل لاپتہ ہوا تھا۔

 انسپکٹر جنرل آف پولیس کشمیر وجے کمار نے کہا کہ جنوبی کشمیر کے شوپیان ضلع کے امشی پورہ علاقے میں جمعہ کو دو جنگجو اور ایک عام شہری مارا گیا۔آئی جی پی نے کہا، "گاؤں امشی پورہ، شوپیان میں (عسکریت پسندوں) کی موجودگی کے بارے میں پولیس کے مخصوص ان پٹ کی بنیاد پر 24/25کی دیر رات مشترکہ آپریشن شروع کیا گیا۔گھروں کے ایک جھرمٹ کو گھیرے میں لینے کے بعد، شہریوں کو محفوظ مقام پر منتقل کیا گیا۔ اس کے بعد چھپے ہوئے عسکریت پسندوں کا پتہ لگانے کے لیے رات گئے گھر گھر تلاشی شروع کی گئی۔انہوں نے کہا کہ تلاشی کارروائی کے دوران ملی ٹینٹ باہر آئے اور "اندھا دھند فائرنگ کا سہارا لیا"۔ ملی ٹینٹوںکی اندھا دھند فائرنگ میں ایک شہری شکیل احمد شدید زخمی ہوا جو بعد میں دم توڑ بیٹھا جبکہ سیکورٹی فورسز کی طرف سے موثرجوابی کارروائی کی گئی جس میں دونوں ملی ٹینٹوں کو بے اثر کر دیا گیا۔انہوں نے مہلوکین کی شناخت مزمل احمد میر ولد عبدالحمید میر ساکن چھتری پورہ زینہ پورہ اور شارق ایوب ولد محمد ایوب وگے ساکن بونہ پورہ امشی پورہ کے طور پر ہوئی۔پولیس کے مطابق مزمل احمد8نومبر 2021 میں سرگرم ہوا تھا جبکہ شارق ایوب محض 2روز قبل23فروری سے لاپتہ ہوا تھا۔ انہوں نے کہا کہ مزمل کئی عسکری جرائم میں ملوث تھا۔ دونوں کا تعلق لشکر طیبہ سے تھا۔ اسلحے سمیت مجرمانہ مواد (ایک اے کے 56 رائفل اور ایک پستول) اور گولہ بارود بھی برآمد کیا گیا۔