عظمیٰ نیوز سروس
سرینگر// فوج کی چنار کور کے جنرل آفیسر کمانڈنگ لیفٹیننٹ جنرل پرشانت شریواستو نے بدھ کو وادی کشمیر میں فوجیوں کی سیکورٹی اور آپریشنل تیاریوں کا جائزہ لیا۔سری نگر میں قائم اسٹریٹجک کور نے اپنے آفیشل ایکس ہینڈل پر پوسٹ کیا”چنار کور کمانڈر نے شمالی اور جنوبی کشمیر میں سیکورٹی اپریٹس اور آپریشنل تیاریوں کا جائزہ لیا اور مسلسل چوکسی کی ضرورت پر زور دیا،” ۔اس میں کہا گیا کہ کور کمانڈر نے فوجیوں کی تعریف کی اور ان کی لگن کو سراہتے ہوئے اس بات پر زور دیا کہ چوکسی، چستی اور تیاری مشن کے لیے اہم ہیں۔کور نے پوسٹ میں کہا، “انہوں نے چنار کور کے پائیدار جذبے اور ایک پرامن اور ہم آہنگی والے کشمیر کے لیے تمام مشکلات کا مقابلہ کرنے کے عزم کو پھر سے تقویت دی۔”سیکورٹی کا جائزہ سالانہ امرناتھ یاترا کے آغاز سے دو ہفتے قبل سامنے آیا ہے۔یہ یاترا 3 جولائی کو شروع ہوگی اور 9 اگست کو اختتام پذیر ہوگی۔ادھر پولیس سے کہا گیا ہے کہ وہ یاتریوں کی حفاظت کے لیے جموں، سانبہ اور کٹھوعہ کے سرحدی اضلاع میں مزید چوکیاں قائم کرنے کے لیے مقامات کی نشاندہی کرے۔یاتریوں کی پہلی کھیپ یاترا کے آغاز سے ایک دن قبل بھگوتی نگر سے کشمیر کے لیے روانہ ہوگی۔ایک پولیس ترجمان نے کہا”تمام افسران کو تمام ناکے(چیکنگ پوائنٹس)کو مضبوط کرنے کی ہدایت دی گئی ، خاص طور پر رات کے اوقات میں، انہیں ان جگہوں کی نشاندہی کرنے کی بھی ہدایت کی گئی جہاں یاتریوں کی حفاظت کے لیے مزید ناکے قائم کیے جاسکتے ہیں،” ۔ ڈپٹی انسپکٹر جنرل(ڈی آئی جی) جموںرینج شیو کمار شرما نے بیس کیمپ، قیام گاہوں، یاترا کے راستے، سی سی ٹی وی تنصیبات اور پارکنگ ایریاز میں مختلف پولیس اور نیم فوجی دستوں کی تعیناتیوں کے سیکورٹی آڈٹ کے دوران پولیس افسران کو بتائی۔ادھرسی آر پی ایف نے بدھ کے روز بھگوتی نگر امرناتھ یاترا بیس کیمپ کے اندر اور اس کے آس پاس یاتریوں کی حفاظت کو یقینی بنانے کے لیے انسداد تخریب کاری کا آپریشن کیا۔ حکام نے بتایاکہ سونگھنے والے کتوں، میٹل ڈیٹیکٹرز اور نگرانی کے آلات کی مدد سے سینٹرل ریزرو پولیس فورس یونٹوں نے پارکنگ ایریا اور بیس کیمپ کی طرف جانے والی سڑکوں پرتلاشی کی ایک وسیع مشق کی۔انہوں نے بتایا کہ بیس کیمپ سے متصل دریائے توی کے کنارے اور دیگر مختلف عمارتوں میں بھی تلاشی کی گئی۔جموں و کشمیر پولیس کے سیکورٹی ونگ نے یاترا کے لیے بھگوتی نگر بیس کیمپ کا چارج سنبھال لیا ہے، جبکہ سی آر پی ایف بیس کیمپ کے ارد گرد سیکورٹی کا انتظام کر رہا ہے۔
