تازہ ترین

شمالی کشمیر کے سوپور میں منشیات فروش گرفتار:پولیس

 سرینگر/ پولیس کی طرف سے سوموار کو جاری ایک بیان میں بتایا گیا ہے کہ سوپور پولیس نے منشیات فروش کی گرفتاری عمل میں لا کر اس کے قبضے سے ممنوعہ نشیلی اشیابرآمدکرکے ضبط کی ہے۔ بیان کے مطابق انچارج پولیس پوسٹ فروٹ منڈی کی قیادت میں پولیس ٹیم نے ناکہ چیکنگ کے دوران تنویر احمد ڈار ولد غلام حسن ساکنہ ربن سوپور کو روک کر اس کی جامہ تلاشی جس دوران اس کے قبضے سے 115گرام چرس برآمد کرکے ضبط کیا گیا۔  پولیس ٹیم نے موقع پر ہی منشیات فروش کو حراست میں لے کر اس کے خلاف ایک ایف آئی آر زیر نمبر 172/2019کے تحت پولیس اسٹیشن سوپور میں کیس درج کرکے تحقیقات شروع کی ہے۔  

گلمرگ گنڈولہ کیش کائونٹر سے50 لاکھ روپے کی رقم چوری

بارہمولہ /عالمی شہرت یافتہ سیاحتی مقام گلمرگ میں چوری کا ایک بڑ ا واقعہ پیش آگیا ہے اور اس واقعہ میں نامعلوم افراد گنڈولہ کائونٹر سے50 لاکھ روپے کے قریب رقم لوٹ کرفرار ہوگئے ہیں۔  ذرائع سے معلوم ہوا ہے کہ اتوار اور سوموار کی درمیانی رات کو نامعلوم چوروں نے گلمرگ گنڈولہ کائونٹر سے پچاس لاکھ روپے نقدی لوٹ لئے ۔  ذرائع کے مطابق سی سی ٹی وی کیمرہ سے بھی چوروں کو دیکھا گیا ہے اوراس سلسلے میں گلمرگ پولیس نے ایک کیس زیر ایف ائی آر نمبر 5/2019 درج کرکے چوروں کی تلاشی بڑے پیمانے پر شروع کردی ہے ۔  منیجنگ ڈاریکٹر گلمرگ کیبل کار ،پروجیکٹ شمیم احمد نے اس بات کی تصدیق کی ہے کہ گنڈولہ کیش کائونٹر سے 50 لاکھ روپے کی چوری ہوگئی ہے جس کی تحقیقات کی جارہی ہے ۔  

حریت کا بات چیت کے بارے میں مؤقف نرم کرنا باعث اطمینان: محبوبہ

سرینگر/سابق وزیر اعلیٰ محبوبہ مفتی نے سوموار کو کہا ''یہ باعث راحت ہے کہ حریت کانفرنس نے بات چیت سے متعلق اپنا مؤقف نرم کیا ہے''۔انہوں نے اس بارے میں فارسی کے ایک مشہور قول کا سہارا لیتے ہوئے کہا''دیر آید درست آید''۔ انہوں نے ایک ٹویٹ میں لکھا ''پی ڈی پی اور بھاجپا کے مابین اتحاد کا بنیادی مقصد حریت اور مرکز کے مابین بات چیت کی راہ ہموار کرنا تھا۔میں نے اس سلسلے میں بہت کوشش کی لیکن ناکام رہی، بحرحال، دیر آید درست آید کے مصداق یہ باعث راحت ہے''۔ اس سے قبل ریاستی گورنر ستیہ پال ملک نے انکشاف کیا کہ حریت لیڈران مرکز کے ساتھ مذاکرات کیلئے تیار ہیں جس کے رد عمل میں حریت کانفرنس (ع)کے چیئر مین میرواعظ عمر فاروق نے بھی مذاکرات کے بارے میں مثبت بیان دیا۔    

شمالی کشمیر کے سوپور علاقے میں گائوں کافورسز محاصرہ اور تلاشی آپریشن

سرینگر /فورسز نے سوموار کو شمالی کشمیر کے سوپور علاقے میں واقع ڈورو نامی گائوں کو محاصرے میں لیکر تلاشی آپریشن کا آغاز کیا۔ اطلاعات کے مطابق ضلع بارہمولہ میں فورسز کا یہ آپریشن فوج، سی آر پی ایف اور ایس او جی اہلکاروں کی طرف سے مشترکہ طور شروع کیا گیا ۔ حکام کے مطابق فورسز کو ڈورو میں جنگجوئوں کی موجودگی کی اطلاع ملی تھی جس کے بعد فورسز کارروائی عمل میں لائی گئی۔ عینی شاہدین کے مطابق گائوں میں گھر گھر تلاشی کا سلسلہ جاری ہے۔  

کشمیر میں چناروں پر اشتہارات کی تنصیب پر سرکار کی پابندی

سرینگر/سرکار نے وادی کشمیر میں چنار کے درختوں پر اشتہارات نصب کرنے پر پابندی عاید کی ہے۔ اس سلسلے میں حکومت کی طرف سے جاری ایک حکمنامے کے مطابق متعلقہ ادارے کو یہ شکایات موصول ہورہی تھیں کہ تعلیمی ادارے،کوچنگ انسٹی چیوٹس،انڈسٹریل اور ایسے ہی تجارتی ادارے چنار کے درختوں پر اپنے اشتہارات نصب کرکے قدرتی حسن کو نقصان پہنچانے کے ساتھ ان سرختوں کیلئے بھی نقصان دہ ثابت ہوتے ہیں۔ آرڈر کے مطابق کشمیر کے صوبائی کمشنر نے تمام ضلع کمشنروں کو ہدایت جاری کی ہے کہ چنار کے درختوں پر اشتہارات نصب کرنے پر عایدپابندی کو یقینی بنایا جائے اور چنار کے درختوں پر جو ہورڈنگس اور سائن بورڈ موجود ہیں اُنہیں فوری طور ہٹایا جائے۔  

جنوبی کشمیر کے پلوامہ میں ہڑتال کے دوران جھڑپیں، تین مظاہرین زخمی

سرینگر/جنوبی قصبہ پلوامہ میں سوموار کو تین نوجوان مظاہرین اُس وقت زخمی ہوگئے جب وہاں مظاہرین اور فورسز کے مابین جھڑپیں ہوئیں۔ اطلاعات کے مطابق پلوامہ قصبے میں نوجوانوں کی کئی ٹولیوں نے سڑکوں پر آکر فورسز اہلکاروں پر سنگباری کی۔ اطلاعات میں مزید بتایا گیا ہے کہ فورسز نے جواب میں آنسو گیس کے گولے داغے اور پیلٹ فائر کئے۔ ضلع اسپتال پلوامہ میں ذرائع کے مطابق وہاں تین نوجوانوں کوزخمی حالت میں پہنچایا گیا۔ دریں اثناء قصبے میں جنگجوئوں کی ہلاکت کیخلاف مکمل ہڑتال ہے۔ واضح رہے کہ نزدیکی ضلع شوپیان میں گذشتہ روز فورسز کے ساتھ معرکہ آرائی کے دوران چار مقامی جنگجو جاں بحق ہوگئے تھے۔  

جموں کشمیر سے متعلق امت شاہ کی پہلی بل آج پارلیمنٹ کے سامنے پیش ہونی متوقع

سرینگر /جموں کشمیر میں بین الاقوامی سرحد کے دس کلو میٹر احاطے میں رہنے والے شہریوں کو تعلیمی اداروں اور سرکاری نوکریوں میں ریزرویشن دینے سے متعلق ایک بل پارلیمنٹ میں سوموار کو پیش ہونی متوقع ہے۔ ذرائع کے مطابق یہ مرکزی وزیر داخلہ  امت  شاہ کی پارلیمنٹ میں پیش کی جانے والی پہلی بل ہوگی جو اپنے بیان میں یہ بل فوراً پا س کرنے کے حق میں بیان بھی دیں گے ۔ اس کے علاوہ مرکزی وزیر قانون روی شنکر پرساد آدھار سے متعلق ایک بل پیش کریں گے۔ وزیر قانون لین دین سے متعلق ایکٹ میں ترمیم سے متعلق بھی ایک بل ایوان کے سامنے رکھیں گے۔  

کشتوار میں جنگجوئوں کو تلاشنے کیلئے تربیت یافتہ کتوں کی خدمات حاصل

سرینگر/فورسز نے سنیچر کو کشتوار کے جنگلات میں جنگجوئوں کو تلاشنے کیلئے تربیت یافتہ کتوں کی خدمات حاصل کرتے ہوئے جنگجوئوں کیخلاف اپنا آپریشن دوسرے روز بھی جاری رکھا۔ واضح رہے کہ گذشتہ روز کشتوار کے کیشون علاقے میں جنگجوئوں اور فورسز کا آمنا سامنا ہوا تھا جس کے دوران طرفین کے مابین گولیوں کا تبادلہ بھی ہوا تھا۔ حکام کے مطابق جنگجوئوں اور فورسز کے مابین گولیوں کے تبادلے کے بعد جب جائے واردات کا معائینہ کیا گیا تو وہاں خون کے دھبے پائے گئے جس کے بعد تربیت یافتہ کتوں کی خدمات حاصل کی گئیں۔ انہوں نے کہا کہ آخری اطلاعات ملنے تک کشتوار کے جنگلی علاقے میں فورسز آپریشن جاری تھا۔    

میرواعظ عمر فاروق خانہ نظر بند

سرینگر/حکام نے سنیچر کو حریت کانفرنس (ع) کے چیئر مین میرواعظ عمر فاروق کو اُن کی رہائش گاہ واقع نگین میں خانہ نظر بند کیا۔ ایک ترجمان کے مطابق پولیس کی ایک ٹیم میر واعظ کی رہائش گاہ پر پہنچ گئی اُور اُنہیں مطلع کیا کہ وہ خانہ نظر بند ہیں۔ ترجمان کے مطابق پولیس نے تاہم اُن کی خانہ نظر بندی کی کوئی وجہ ظاہر نہیں کی۔  

کشتوار ضلع میں میٹاڈار گاڑی اُلٹنے سے 15 مسافر زخمی

سرینگر/کشتوار ضلع میں سنیچر کوکم سے کم15مسافر اُس وقت زخمی ہوگئے جب ایک میٹاڈار گاڑی بیچ سڑک پر اُلٹ گئی۔ اس حادثے میں زخمی ہونے والوں میں کچھ بچے بھی شامل ہیں۔ اطلاعات کے مطابق یہ حادثہ فوگ موڑ علاقے میں اُس وقت پیش آیا جب کنڈی سے ایک میٹاڈار گاڑی کشتوار کی طرف جارہی تھی۔ پولیس ذرائع کے مطابق 15زخمی مسافروں کو ضلع اسپتال کشتوار پہنچایا گیا ہے جن میں گاڑی کا ڈرائیور بھی شامل ہے۔  

بانڈی پورہ میں آگ لگنے سے مسجد شریف کو نقصان

سرینگر/شمالی کشمیر کے بانڈی پورہ ضلع میں ایک مسجد شریف آگ کی واردات میں نقصان سے دوچار ہوگئی۔ یہ واقعہ ضلع کے نوپورہ علاقے میں گذشتہ شب کے دوران پیش آیا۔ مقامی ذرائع کے مطابق مسجد شریف کی تیسری منزل اس واردات میں مکمل طور خاکسترہوگئی ۔ انہوں نے مزید کہا کہ آگ بجھانے والے عملے کو بلایا گیا تھا تاہم آگ اتنی تیز تھی کہ اس نے آناً فاناً مسجد کی اُوپری منزل کو راکھ کردیا۔ آگ لگنے کی وجہ فوری طور پر معلوم نہیں ہوسکی ہے۔  

جنوبی ضلع پلوامہ میں فوج کی مبینہ فائرنگ میں آٹو ڈرائیور زخمی

سرینگر/جنوبی ضلع پلوامہ میں فوج کی مبینہ فائرنگ کے نتیجے میں ایک آٹو ڈرائیور زخمی ہوگیا۔ یہ واقعہ گذشتہ شام دیر گئے اُس وقت پیش آیا جب فوج نے رومشی نالے کے قریب محمد شفیع گنائی ساکنہ وہی بگ ، جو اپنے آٹو میں جارہا تھا،کو رکنے کا اشارہ کیا لیکن اُس نے فورسز کا اشارہ نظر انداز کیا۔ اطلاعات میں بتایا جارہا ہے کہ فوجی اہلکاروں نے فوری طور پر آٹو پر فائر کھولا جس سے محمد شفیع زخمی ہوگیا۔زخمی محمد شفیع کو بعد میں سرینگر میں قائم ہڈیوں کے اسپتال میں منتقل کیا گیا۔ فوج نے اس واقعہ کے بارے میں کوئی وضاحت نہیں کی ہے۔  

بونیار اُوڑی میں مسلح تصادم ،ایک جنگجو جاں بحق ،معرکہ جاری

بارہمولہ /شمالی کشمیر کے ضلع بارہمولہ میں اُوڑی علاقے میں واقع بوجتھالن بونیار میں سنیچر کوفورسز اور جنگجوئوں کے مابین ایک جاری معرکہ آرئی میں ایک جنگجو جاں بحق ہوگیا ۔ ذرائع سے معلوم ہوا ہے کہ سنیچر کی صبح فوج کے 6جیکلائی سے وابستہ اہلکاروں نے بوجتھالن بونیار اوڑی علاقے کو جنگجووں کی موجودگی کی اطلاع پاتے ہیں محاصرے میں لیکر آپریشن کا آغاز کیا۔ اس دوران جنگجو ئوں نے فورسز پر فائرنگ کی اور فورسز کی جوابی فائرنگ میں ایک جنگجو جاں بحق ہوگیا ۔ موصولہ اطلاعات کے مطابق معرکہ آرائی ابھی جاری تھی۔  

کشتوار کے جنگل میں فورسز اور جنگجوئوں کے مابین معرکہ آرائی کا آغاز

 سرینگر/کشتوار کے جنگل میں جمعہ کو فورسز اور جنگجوئوں کے مابین معرکہ آرائی شروع ہوگئی۔ یہ معرکہ اُس وقت شروع ہوگیا جب فورسز نے کیشون جنگل میں تلاشی آپریشن کا آغاز کیا۔ ایس ایس پی کشتوار شکتی کمار پاٹھک کے مطابق فوج اور ایس او جی اہلکاروں پر مشتمل ایک ٹیم نے کیشون جنگل میں تلاشی آپریشن شروع کیا جس کے دوران جنگجوئوں اور فورسز کا آمنا سامنا ہوا اور طرفین میں گولیوں کا تبادلہ ہوا۔ انہوں مزید کہا کہ فوری طور پر کسی کے جاں بحق یا زخمی ہونے کی کوئی اطلاع نہیں ہے ۔  

کپوارہ ضلع میں چار منشیات فروشوں پر پی ایس اے کا اطلاق:پولیس

 سرینگر/پولیس نے جمعہ کو ایک بیان میں کہا کہ کپوارہ پولیس نے چار منشیات فروشوں، جن کی شناخت ریاض احمد بڈانہ ، مدثر احمد پسوال، تنویر احمد رینہ اور ضمیر احمد رینہ ساکنان امروہی کرناہ کے بطور ہوئی ہے، پر پبلک سیفٹی ایکٹ ( پی ایس اے)عائد کرکے انہیں جیل بھیج دیا گیا۔ مذکورہ منشیات فروشوں کے خلاف ایف آئی آر زیر نمبر 02/2019 کرالہ پورہ پولیس اسٹیشن میں ایک کیس درج کیا گیا تھا اور ان کے قبضے سے بڑی مقدار میں ہیروئن برآمد کرکے ضبط کی گئی تھی۔ پولیس بیان کے مطابق ریاض بڈانہ اور تنویر رینہ کو اننت ناگ جیل بھیج دیا گیا ہے جبکہ مدثر پسوال اور ضمیر رینہ کو پی ایس اے کے تحت ضلع جیل بارہ مولہ میں مقید رکھا گیا ہے۔ پولیس بیان میں مزید بتایا گیا ہے کہ سرینگر پولیس نے عشائی باغ نگین کے نزدیک ناکہ چیکنگ کے دوران عمران عبدا للہ ولد محمد عبدا للہ ساکنہ بٹہ پورہ صفا پورہ گاندربل کو روک کر ا

اننت ناگ ہوائی فائرنگ واقعہ: موٹر سائیکل سے گرنے والا نوجوان گرفتار

سرینگر/جنوبی قصبہ اننت ناگ میں جمعہ کو فورسز نے ایک نوجوان کو اُس وقت گرفتار کیا جب وہ فورسز کی ہوائی فائرنگ کے بعد موٹر سائیکل سے گرگیا۔گرفتار شدہ کی شناخت نہیں ہوسکی ہے تاہم خبر رساں ایجنسی جی این ایس کے مطابق اُسے جوئنٹ انٹراگیشن سینٹر اننت ناگ منتقل کیا گیا ہے جہاں اُس سے پوچھ تاچھ کی جارہی ہے۔ اس سے قبل آج صبح اننت ناگ کے پی روڑ پراُس وقت افراتفری کے مناظر نظر آئے جب تعینا ت فورسز اہلکاروں نے ایک موٹر سائیکل کو روکنے کیلئے ہوا ئی فائرنگ کی۔ اطلاعات میں بتایا جارہا ہے کہ موٹر سائیکل پر سوار دو نوجوان فورسز کی طرف سے رکنے کا اشارہ نظر انداز کرتے ہوئے فورسز کی رکاوٹ عبور کرکے نکل گئے جس کے بعد سی آر پی ایف اہلکاروں نے اُنہیں روکنے کیلئے ہوا میں گولیاں چلائیں۔ جی این ایس کے مطابق اس دوران موٹر سائیکل کی پچھلی سیٹ پر سوار نوجوان گرگیا جس کو گرفتار کیا گیا تاہم موٹر سائیکل چ

جنوبی کشمیر میں سرگرم جنگجو کی بہن اور بہنوئی کو اغوا کرنے کے بعدزخمی حالت میں چھوڑا گیا

سرینگر/نامعلوم بندوق برداروں نے جمعہ کو جنوبی کشمیر کے اننت ناگ ضلع میں سرگرم جنگجو کی بہن اور بہنوئی کو اغوا کرنے کے بعد ٹانگوں میں گولیاں مار کر زخمی حالت میں چھوڑ دیا۔ اطلاعات کے مطابق بندوق برداروں نے گذشتہ شام آروانی علاقے کے رہنے والے لشکر طیبہ سے وابستہ ایک سرگرم جنگجو کی بہن اور بہنوئی کو اغوا کرلیا۔ اغوا شدہ میاں بیوی کی شناخت نصرت اور اس کے شوہر مدثر احمد مکرو کے طور ہوئی ہے ۔ نصرت کا بھائی، نثار احمد چڈرو، گذشتہ ایک سال سے لشکر کا ایک سرگرم جنگجو ہے۔ پولیس ذرائع کے مطابق دونوں کو مکرو محلہ آرونی سے ایک کار میں اغوا کیا گیا تھا۔ اطلاعات کے مطابق آج دونوں کو آروانی علاقے میں ہی زخمی حالت میں چھوڑا کیا گیا تھا جس کے بعد اُنہیں اسپتال منتقل کیا گیا۔    

اننت ناگ میں دو موٹر سائیکل سوار نوجوانوں کو روکنے کیلئے فورسز اہلکاروں کی ہوائی فائرنگ

سرینگر/جنوبی قصبہ اننت ناگ میں جمعہ کو اُس وقت افراتفری کے مناظر نظر آئے جب کے پی روڑ پر تعینا ت فورسز اہلکاروں نے ایک موٹر سائیکل کو روکنے کیلئے ہوا ئی فائرنگ کی۔ اطلاعات میں بتایا جارہا ہے کہ موٹر سائیکل پر سوار دو نوجوان فورسز کی طرف سے رکنے کا اشارہ نظر انداز کرتے ہوئے اُن کی طرف سے کھڑی کی گئی رکاوٹ عبور کرکے نکل گئے جس کے بعد سی آر پی ایف اہلکاروں نے اُنہیں روکنے کیلئے ہوا میں گولیاں چلائیں۔ مقامی ذرائع کے مطابق فورسز نے واقعہ کے فوراً بعد علاقے کو گھیرے میں لیتے ہوئے تلاشیاں شروع کیں تاکہ بھاگنے والے دو نوجوانوں کو پکڑا جاسکے۔ واضح رہے کہ کے پی روڑ اننت ناگ پر ہی12جون کو جنگجوئوں کے ایک حملے میں5سی آر پی ایف اہلکاراور ایک پولیس آفیسر ہلاک ہوئے تھے جس کے بعد سے علاقے میں فورسز سخت ترین چوکسی کی حالت میں ہیں۔  

راجوری میں آسمانی بجلی گرنے سے شہری جاں بحق، پانچ بکریاں بھی لقمہ اجل

سرینگر/ راجوری ضلع میں آسمانی بجلی گرنے کے نتیجے میں ایک شہری جاں بحق جبکہ اس کی پانچ بکریاں بھی لقمہ اجل بن گئیں۔ اس حادثے میں ،جو راجوری کے درہال علاقے میں پیش آیا، میں ایک اور شہری زخمی بھی ہوگیا۔ اطلاعات کے مطابق گذشتہ رات دیر گئے درہال، راجوری میں بادلوں نے زور دار طریقے سے گرجنا شروع کیا جس کے دوران آسمان سے ایک بجلی گری اور عبد الرزاق ولد لال حسین ساکنہ بری درہال کو نشانہ بناتے ہوئے اُسے جاں بحق کیا۔ آسمان سے گرنے والی اس بجلی نے نہ صرف عبد الرزاق بلکہ اُس کی پانچ بکریوں کو بھی لقمہ اجل بنادیا۔ عبد الرزاق کے آس پاس موجود تصور حسین ولد ساجاوال حسین اس حادثے میں زخمی ہوگیا۔  

کرناہ میں سابق ایم ایل اے کا مکان آگ کی واردات میں تباہ

 کرناہ // نہچیاں کرناہ میں آگ کی ایک ہولناک واردات میں پی ڈی پی کے سینئر لیڈر اور سابق ایم ایل اے کرناہ، ایڈوکیٹ راجہ منظور کا مکان خاکستر ہو گیا ہے۔ ذرائع کے مطابق نہچیاں کرناہ میں جمعرات اور جمعہ کی درمیانی رات کو آگ ظاہر ہوئی جس نے دیکھتے ہی دیکھتے دو مکانوں کو اپنی لپیٹ میں لے لیا ۔ آگ لگنے کی وجہ فوری طور پر معلوم نہیں ہو سکی ہے تاہم بتایا جا رہا ہے کہ آگ سے لاکھوں روپے کی املاک کو نقصان پہنچا ہے ۔ سابق ایم ایل اے کفیل الرحمان ، ایم ایل سی جاوید مرچال ، کانگریس لیڈر پروفیسر جہانگیر دانش کے علاوہ سیول سوسائٹی کرناہ نے آگ سے ہوئے نقصان پر دکھ کا اظہار کیا ہے ۔